Nayla - Tamila

Tamila

Tameddit-nni, ala rekbeɣ ɣer lkar, serseɣ iman-iw ɣef ukersi, tameṭṭut-nni teqqim-d ; ad tiniḍ teḍfer-iyi-d, neɣ tegguni dinna kra ikka wass.

Tezmumeg, tenna.

– Suref-iyi, sebḥa rẓiɣ-ak aqerruy-iw.

Zmumgeɣ-as ula d nekk, rriɣ-as.

– Xaṭi.

Tameṭṭut iḍsa wudem-is, tenna.

– Ihi ad ak-kemmleɣ taqsiḍt.

Huzzeɣ tuyat-iw, rriɣ-as.

– Ma ihwa-yaw !

Tussu, tessemsed taɣect-is.

– Teḥka-yi yiwet n temɣar ɣef dda Latamen meskin. Ad k-ɛiwdeɣ ayen iyi-tenna. Ur ttzeyyideɣ awal, ur senɣaseɣ wayeḍ. Ad ak-ḥkuɣ s taɣect-is.

Ass-nni temmut Saɛdiya, tmeṭṭut n Latamen, ikcem-d si Fransa ad tt-iwali, ad tt-inṭel. Iḥemmel-itt, ɣas nettat tedder kan yid-s, urǧin tezhi neɣ tennecraḥ.

Acimi ur t-tḥemmel ?

Yal yiwet amek teqqar. Deg tallit-nni, yuget wawal deg tala …

Maca anef-aɣ i taluft-a tura ; ahat ass wayeḍ ad nemmeslay fell-as.

Nniɣ-am yusa-d si Fransa. Irfed nneɛc n tmeṭṭut-is ɣer tjebbant. Mi bdan ad as-ttarran akal, iṭṭerḍeq d imeṭṭawen, ittru s uḥaruq. Wehmen medden ! Urǧin ixdem-itt urgaz uqbel-is.

Argaz ur itettru, ladɣa ɣef tmeṭṭut-is.

Mi iɛeddan 40 wussan, ksen zerb i uẓekka, Latamen iɛedda ixḍeb yiwet n tlemẓit tettili-yas, isem-is Tamila. Wahmen At  taddart ! Yiwet ur ifhim !

Laḥmala iḥemmel Saɛdiya, abeddel ibeddel-itt s Tmila. Irna ur ɛeddan ula d 3 wayyuren !

Snat ledwar, segmi ixeṭṭeb, ixdem tameɣra tasusamt ; irfed taqcict, yuɣal ɣer Fransa.

Tamila d ayyur, win tt-iwalan ad ijxel. Sneɣ-tt, ayyur deg igenni, nettat deg lqaɛa. Ulac win ur tt-nmenna deg taddart. Nuɣen fell-as irgazen d iderma !

Maca akka, lmektub ittaru akken i as-ihwa ; deg tira-s, tṣaḥ-d i Latamen !

Deg Lpari, nnan tekcem ɣer uɣerbaz n ṣṣenɛat, mi tfukk leqraya, tebda ixeddim, d taxeyyaṭ.

Tezha teqcict s tmeddurt-is tamaynut. Iḍsa wudem-is, ittfeǧǧiǧ am tefnar neɣ axir. Temẓi tesɛedda deg zyeṛṛ n yimawlan-is ittasmen, tesfeḍ deg cfawa-s. Tɛawed-d talalit ...

Nnan timeddiyin, tettɛeṭṭil deg beṛṛa, ur tkeččem s axxam armi iɣli-d yiḍ. Iɛreḍ Latamen ad tt-iḥbes deg yixeddim, ad as-ibeddel tikli, tugi. Teqqar-as : « D azref-iw ; mačči deg taddart i nella akken ad iyi-terreḍ takmamat ! »

Idder akken, ul iqber, tazmert ulac !

Ass-nni, deg ubrid ɣer umkan, ur cfiɣ isem-is, anda isɛa lweɛd d yiwen umaruki ad as-iseknen lqahwa i d-irsen i lbiɛ, brarḥent wallen-is ɣef tmeṭṭut-is …

Tameṭṭut tetteɛluluq ɣer yiɣil n umɛellem-is. Teddun ttaḍsan, tikwal ad tazzel, amzun ad as-terwel, winna ad yazzel deffir-s, ad tt-id-iṭṭef, ad tt-iẓmeḍ ɣur-s, ad tt-iḥennec ! Tikwal ttemlilin icenfiren-nsen, uqbel ad as-ibru, ad kemlen tikli.

Ibedd Latamen am yilem ! Ibedd-as wawal am uqedmir deg tgerjumt. Ifadden kkawen, allen luɣent, imi ildi. Yuɣal imlelli, iɣli, isreɛ.

Mi d-yuki deg sbiṭer, yufa-d Tamila nnig uqerruy-is, lkaɣeḍ deg ufus.

Tenna-yas.

– Atan usuter n tibrat ! Ṭṭfeɣ abugaṭu, ad d-iɛeddi ad ak-issefhem.

Teffeɣ, tamuɣli ur tt-tefki ɣer deffir. Latamen iqmec allen-is. Lḥan imeṭṭawen ɣef leḥnak-is d iḥmayanen