Nayla - Akked urgaz afuyan

Akked urgaz afuyan

– Tettbaneḍ teɛyiḍ, irna ur tebɣiḍ ad tessugteḍ awal, maca welleh ard ak-iniɣ ayen bɣiɣ ad tesleḍ.

Mmuqleɣ winna d-iqqimen ɣer tama-w. Argaz d afuyan, d azeggaɣ, acekkuḥ-is ɣezzif, d imserreḥ. Allen-is meqqer-it, berrik-it am yiɛeqqayen n uzemmur yewwan. D imɣinǧer. Icenfiren-is d izuranen.

– Tessefraweḍ ass-nni telliḍ deg tesdawit, cennun wiyiḍ isefra-k.

Sakdeɣ-t s lewhama ; nniɣ-as.

– Tesneḍ-iyi ?

Inna.

– Ur wehhem ! Ayen teddreḍ merra seg wass-nni d-luleḍ yura deg twenza-k. Tiṭ-ik tayeffust d ṭṭaq n ṛuḥ-ik ! Wessiɛet, zeddiget, lqayet mliḥ. Tiṭ-ik tazelmaḍt, tḥesseb ussan ara tedreḍ ! Ul-ik ḥnin, izga ittru. Deg-k zerriɛa ! Ur tettɛeṭṭil ad teṭṭerḍeq.

Issusem tagnit, yuɣal irna :

– Ayen ara teddreḍ, i t-iẓran ala Rebbi. Maca ad ak-iniɣ : abrid-ik issawen, sya u sya d iwaɣezniwen d tteryulat, ḥun Rebbi deg-k izem/aɣilas ! Irna ddan yid-k iɛessasen, seg yal tama zzin-ak !

Issusem i tikkelt tis snat. Nekk fkiɣ allen-iw ɣer Temguḍt.

– Deg unyir-ik tella ccama ; ccama meqret, d timserrit. Ccama am ta, isɛa-tt Cacnaq, isɛa-tt Massnsen, isɛa-tt Yuba wis sin. Ccama tezger-d leqrun, tleḥḥu deg tsuta ɣer tayeḍ.

Irra-d anehhit d alqayan :

– Nekkni, mačči d agdud menwala a Mahdi !! Annect-a tḥulfeḍ Syes, ɣas ur tefhimeḍ acimi neɣ amek ! Teḥsiḍ belli ur d-nezgir leqrun n cwal d lḥif akka kan, war lmeqsud !

Meqteɣ deg-s tamuɣli. Ur iban ibehba neɣ illa kra yuḍen. Udem-is ittqiṭir d sser. Anyir-is ad as-tiniḍ tedhen-it tafat.

Netta, amzun ittmeslay d yiman-is, ikemmel, inna .

– Mi qesden At  nger ad sexsin tcemmaɛt n ccetla-nneɣ, tuɣ-d s wadda. Mi suḍen akken ad tnes, sakin-tt-id, tendekwal-d tirgit-is, ikker uḥeǧǧaǧu deg igenni.

Ula d wid-nneɣ ur uminen ! Ur heyyan iman-nsen i tikli ɣer tafat. Ɣef waya i iɛreq ukessar d usawen …

Mi wḍent tgecrar s akal, ɣilen dayen, ad nuɣal am wiyiḍ, ad nuɣal d wiyiḍ, ad nessers anzel, ad aɣ-ittu lmektub !

Lmektub yura uqbel ad d-nulfun isekkilen. Arraw n Ḥam, deg-sen aklan, deg-sen igelliden , am wass d yiḍ, am times d waman, am sin ɣef tebna tudert.

Wid ibɣan ad gren arraw n Ḥam deg ccetla n Sam, am wid ibɣan ad gren aman deg zzit, neɣ tament deg yefki.

Axxam iṛwan, d win i ten-isɛan akken llan, ttakken tazmert i yiri.

Iskeḥkeḥ. Issuk afus ayeffus ɣef yimi-s.

– Mazal lbaḍna ad teqqim s tekmamt a Mahdi. Lbaḍna am tmellalt, ur tettefrurux war lawan ! Lbaḍna tedder deg ul-ik d asteqsi : Acimi ? Amek ? Melmi ?

Mi ara d-talli tafrara, ahat ad tedmeḍ aqrab-ik, ad teṭfeḍ abrid ɣer Siwa ! Ɣer Siwa, iruḥ Aleksunder Ameqran, yugem-d tazmert ikkan nnig n tzemmar. Ɣer Siwa, yuɣal Cacnaq, iswa-d seg tala uqbel ad iṭṭef abrid ɣer Lquds, neɣ ɣer Jirusalam.

Cacnaq ur illi d aferɛun menwala, d aferɛun am wiyiḍ ! Cacnaq d allel n yIlu ; iqqim-d yisem-is d wayen ixdem deg wawal n yIlu, deg Turat akked Linjil. Ula deg uẓekka-s, inṭel s lfeṭṭa, ur irri dheb am wiyiḍ !

Anef i lbaḍna ad teqqim d lbaḍna a Mahdi ! Tamellalt n tidet urɛad d-iwwiḍ lawan akken ad tefrurex !

Ass-nni, ahat, tidet ad tili ddaw n tsumta-k ; kečč ad tettnadiḍ akkin i yilel !

Anwa iẓran anda ara tiliḍ dqiqa-nni, anwa aẓru ɣef ara tesserseḍ aqerruy-ik akken ur k-ittawi nadam ?

I igganen ala win mi immut wul, izuɣuren wiyiḍ am lhica. Agdud awtem izga yuki, izga ibges.

Tiṭ ur nettnudum, tzerreɛ nadam deg tmura, tezzuzur-it ɣef wallen !

Cwal i d-iteddun, yugar wid iɛeddan !

Deg wul n cwal ad d-temɣi tidet ; ad d-ɛiwed talsa talalit ; neɣ ad temmet deg tezdeg …

D agdud yugaren iḍelli deg tmesgida tasduklant ; ara yagaren azekka tizemmar n tallest ; ara ikecmen ɣer tmesgida i tikklet tis snat. Winna d agdud ifren yIlu akken ad yini syes : igduden merra kifkif-iten, ala wid icceččen ameɣbun, iḥudren agujil, ilḥan ɣef lqaɛa s usurif afessas.

Agdud ixtar yIlu tazwara n zman, ur t-ixtar akken ad iḥqer iɣerfan, ad yawwi talsa ɣef yicerfan, tawaɣit ikfan ad d-islal tayeḍ. Winna, ad d-yass ugdud ddaw-as, ad t-irr ddaw-as !

Agdud alsan a Mahdi, d win issidiren deg ulawen n iɛeggalen-is telqeq n lṭufan.

Rfed allen-ik s igenni, muqqel ɣer later n yitran !

Later n ccetla-k, yugi ad ak-ibru ! Anda tebɣiḍ ruḥ, ad tafeḍ ddaw n uḍar-ik.

Mazal lweɛd ur d-iwwiḍ !! Mazal agdud amaziɣ ad imdarkal deg yiberdan ibbaxlulḍen, ad iqdec ɣef wid ur nuklal.

Wid i as-iksen aman, i t-iǧǧan i fad, ttwehhin-as tiliwa ur nteffi.

Lexyal ilḥan deffir-s, isefḍen lǧerra-s, mazal ad t-iṭṭafar am tili. Tura, icceyyeɛ-d wid ara s-izewwiren akken ad t-meknen ɣer lkaf.

Refden ssenǧaq n tirẓi-s, n beṭṭu-s, icenga d-ifrurin seg tasa-s !

Ileḥḥu unyir n urgaz afuyan d tidi. Allen-is ldint am tiwwura n igenwan.

– Lḥu deffir wul-k ! Amdan ukyis, d win ikeysen d yiman-is, d warraw-is, d tmeṭṭut-is ! Ur iḥemmel yiwen wiyiḍ ma ikreh udem-is deg lemri ! Ur isseččay yiwen arraw n lǧar, ma iǧǧa tarwa-s i teffeẓ-itt laẓ.

Uqbel ad tḥewseḍ timura n medden, uqbel ad tisineḍ amezruy n tɣermiwin n usammer akked umalu, isin tamurt-ik ! Rzu ɣer Imedɣasen bnan lejdud-ik 3 000 iseggasen uqbel talalit n Sidna Ɛissa ucbiḥ. Ruḥ ɣer Tqucac n Mlawa, dinna ad tafeḍ tagest n tafat, qqnen ɣur-s idurar nneɣ !

Issusem. Iwwi afus-is ɣer yimi-s, isfeḍ-it.

Inna-yi.

— Tesneḍ Tiqucact n Mlawa ?

Nniɣ-as.

— Ur tent-sineɣ. Ttwaliɣ-tent kan mebɛid !

Izmumeg, inna.

— Amek ara temleḍ i wiyiḍ ayen ur tessineḍ ? Amek ara tessekneḍ abrid ur iɛfis uḍar-ik ?! Mi ara tettwaliḍ ibeɛɛac siksilen nneɛma, ini-yas i wul-ik ataya laẓ, lqaɛa ad tenxeṣ lɣella-s, amdan ad as-iwɛer wučči !

Llant wallen, tella tmuɣli ; illa umuqel, illa uwali. Mačči kra n win issikiden iẓer …

Uqbel ad tferḍeḍ azrib deg ileḥḥu lǧar d uberrani, sired tiɣerɣert n uxxam-ik ! Uqbel ad tisserdeḍ udem-ik, slil ifassen-ik. Ifassen yumsen, ur sizdigen tafekka.

Iwwi afus-is ɣer ucekkuḥ aɣezfan, iḍegger-it ɣer deffir.

— Azekka, sdat yIlu, ad k-iḥaseb wul-ik teǧǧiḍ war laḥmala, ad k-iḥaseb uḍar-ik ur nessin asawen d luḍa, ad k-iḥaseb yiles-ik m ur tgiḍ lqis, ad ak-iḥaseb yal aḥric deg tfekka-k !

Iles bu-lfetnat, iles bu-tifrat, d kečč i d-bab-is.

« Bu-yiles, medden akk ines ! » Kečč iles-ik d imru, asefru-k imgarad ɣef wiyiḍ ! Aru war aḥbas, war asgunfu ! Ur ttak allen-ik zelmeḍ neɣ yeffes. Awal iḥemmlen, d win innumen ! Awal iḥemmlen, d win iddan akken ddan waman.

Ḍegger iẓra ɣer temda. Sluɣ aman igellen ma ad izdigen.

Anef ad laqben, anef ad ččḥen, anef ad wehmen ! Anef i usuter ad issengucel allaɣen.

Iswi-k deg tira, d asefti n isteqsiyen ! Tiririt fell-asen, mazal ur d-iwwiḍ lawan-is.

Tiṭ ur nettnudum tettɛassa ; urǧin tɣeffel. Gganen yitran, nettat xaṭi !

Abu ara tt-ismuneddlen ur d iwwiḍ wass-is !

Dɣa aru ! Aru war akukru …

Iseggasen ttazalen am tzrezrin iḍfer useyyad illuẓen. Ccib iɣseb-d tikli. Iḍelli kan i tegganeḍ ɣer yaya-k Mbarka deg texxamt-nni deg istaɛwfaw Si Ɛmiruc At Ḥemmuda, i deg itečč uqbel ad izger Asif Aɛebbas akkin !

Iḥbes lkar, uqbel ad yader urgaz afuyan, ifka-yi-d lkaɣeḍ, inna.

– Ɣer aḍris-a.