Nayla - Mahdi

Mahdi

Deg ubrid ilem, leḥḥuɣ war lewhi.

Abrid issawen, ḍeyyiq am yir ṭbiɛa. Sya d akeddar, sya d lkaf ; irna izzi am uzrem inɣa usemmiḍ. Akkin d akessar, asif n wAɣbalu ittnudum.

Ṭlam izedɣen iḍ, ibrek ɣef iẓra, tineqlin d ukerruc.

Tiɣilt n Ɛmer u Si Aḥmed, tweɛɛa. Beddeɣ. Fkiɣ tamuɣli ɣer udrar Ubawal. Iɛnunec nnig n taddart am ugeldun.

Deg yigenni, akkin i tɣaltin, itran mwexxaren am wulawen ɣef idla ccek.

Tasusmi tesmuzhur deg yimeẓẓuɣen-iw. Ɣas selleɣ i lbaḍnat-is, maca zgant frent fell-i, ur tent-fhimeɣ. Mazal sawḍeɣ ad isineɣ tutlayt n tsusmi !

Tasusmi deg-s tamusni, i nnan at zik. Nekk ul-iw ittmeǧǧid, ɣas imi-w izemmen.

Qebreɣ. Bɣiɣ ad suɣeɣ s ṭṭelq n tgerjumt-iw, am wuccay-nni n tmucuha. Maca ṭfeɣ iman-iw. Setḥaɣ. Irna ugadeɣ ad tekṛuṛi taddart am yiwen urgaz !

Wteɣ tacabcaqt n lbirra tilemt s rkel. Ula d ! i nniɣ deg ul-iw !

— Sani tleḥḥuḍ a Mahdi, ḥbes ad nawḍeɣ ! i inna Meqran.

Zziɣ ɣer-s, nniɣ-as :

— Eǧǧ-iyi a Meqran, ttxil-k, bɣiɣ ad qqimeɣ akked yiman-iw.

Iḥbes Meqran tikli. Iger ifassen-is ɣer leǧwab n ubalṭun-is.

Meqran ɣur-s azal n 28 iseggasen, d amuzyin, isɛa tayuga n claɣem tareqqaqt, llebsa-s d tamellalt, sebbaḍ-is zgan ttiriqen.

Yussu. Inna-yi.

— Lḥu, aqli deffir-k. Ur ak-sluɣuyeɣ tiɣimit d yiman-ik, ur k-ttaǧǧaɣ. Ddu waḥdek, maca ḥsu mačči iman-ik i telliḍ.