Nayla - Kra n iɛeggalen sdat n uxxam
Kra n iɛeggal sdat n uxxam
« Ur fhimeɣ ansa i as-d-tekka tikti n zwaǧ d teqcict-a ! D tisewham, ad as-tiniḍ ulac tiqcicin deg taddart. Twalam dɣa, ugar tiqcicin arrac. Ma tkemmel akka, ad d-negri deg ɛewwiq, ad burrent merra teḥdayin-nneɣ.»
« Atan ččuren yexxamen, neflen ! Irna tuget deg-sent zegrent i 30 n iseggasen. Nnan deg tmurt n Lezzayer s umata, 52 % n teḥdayin ur zwiǧent ! »
« Zik-nni, 14 iseggasen ad tili teqcict deg uxxam-is. 15 iseggasen ad tebdu ddeyra. I ittɣimin, ala tin iɛaben neɣ tin isɛan yir aṭan.»
« Tesɛa yemma 18 iseggasen mi iyi-d-turew. 18 iseggasen, qqaren-as meqqert, tcab ur turiw ! »
« Ibeddel zman ay atmaten ! Axir win immuten, win idren. »
« Illa deg lemtel : « Win ibɣan ad ixdem lxir, ad izwir deg wat uxxam. »
Ma yal ilemẓi iwwi-d tameṭṭut seg beṛṛa, i tid-nneɣ anwa ara tent-yaɣen ? »
« Irna, ma ur as-tehwi yiwet deg taddart-nneɣ, izmer ad irr ɣer Sellum, ɣer Iwaquren, ɣer Imceddalen ; izmer ad iruḥ ɣer Yiɣil Ucekrid, ɣer At Mlikec ; neɣ ad ijbu ɣer Igawawen. Wessiɛet tmurt, ur tt-id-iqeṭṭeɛ uḍar ! »